دنیا کا سب سے بڑا موبائل فون میلہ’’ورلڈ موبائل کانگریس بارسلونا میں شروع

بارسلونا(مرزا ندیم بیگ )دنیا میں موبائل ٹیکنالوجی کا سب سے بڑا ایونٹ 26 فروری بروز پیر سے سپین کے شہر بارسلونا میں شروع ہوگیا جو یکم مارچ تک جاری رہے گا۔موبائل ورلڈ کانگریس میں نت نئے اسمارٹ فونز اور فون ٹیکنالوجی کو پیش کیا جائے گا اور یہ اینڈرائیڈ فونز کو سامنے لانے کا سب سے بڑا ایونٹ بھی ہے۔یہ میلہ حیرتوں اور نت نئی ایجادات کا حامل ہے۔سام سنگ کی جانب سے ایک بار پھر اپنے فلیگ شپ ایس سیریز کے فونز اس ایونٹ میں متعارف کرائے جارہے ہیں، گزرے برسوں میں نوکیا، ایچ ٹی سی، سونی اور ایل جی اس ایونٹ میں سام سنگ کا مقابلہ کرتے رہے ہیں، مگر اس سال سامنے آنے والی لیکس سے عندیہ ملتا ہے کہ دیگر کمپنیاں اس بار سام سنگ کے مقابلے پر نہیں آرہیں اور گلیکسی ایس نائن اور ایس نائن پلس کے مقابلے پر کوئی ڈیوائس نہیں آرہی۔ سام سنگ کی جانب سے یہ فونز ایپل کے آئی فون ایکس کے مقابلے پر لائے جارہے ہیں، تاہم اس کا ڈیزائن ایس ایٹ جیسا ہی ہے تاہم ڈوئل کیمرہ سیٹ اپ پہلی بار ایس سیریز کے فونز میں دیئے جانے کا امکان ہے جبکہ پہلی بار کسی فون میں ڈوئل آپرچر سیٹ اپ بھی دیا جارہا ہے۔ فیچرز کے لحاظ سے یہ فون سپر امولیڈ بیزل لیس ڈسپلے 18:5:9 ریشو کے ساتھ دیا جارہا ہے جبکہ یہ بھی واٹر اور ڈسٹ ریزیزٹنٹ بھی ہوگا، 3000 ایم اے ایچ نان ریموایبل بیٹری ایس نائن جبکہ ایس نائن پلس میں 3500 ایم اے ایچ بیٹری دی جائے گی۔ ایس نائن کی قیمت 841 جبکہ ایس نائن پلس کی 997 یورو سے شروع ہونے کا امکان ہے۔ایچ ایم ڈی نے گزشتہ سال موبائل ورلڈ کانگریس کا میلہ نوکیا 3310 کے اپ ڈیٹ ورژن سے لوٹ لیا تھا، ایک سال بعد اس کمپنی کے اینڈرائیڈ فونز کچھ زیادہ توجہ حاصل کرنے میں کامیاب نہیں ہوسکے ہیں اور اب تک اس کا کوئی بہترین فلیگ شپ فون سامنے نہیں آسکا ہے جو سام سنگ گلیکسی ایس سیریز یا گوگل پکسل کا مقابلہ کرسکے، مگر اس بار ایونٹ میں 5.5 انچ او ایل ای ڈی ڈسپلے والے ایک فلیگ شپ فون کو متعارف کرائے جانے کا امکان ہے، جبکہ نوکیا سیون پلس اور نوکیا ون فون بھی پیش کیے جاسکتے ہیں، مگر یہ بھی امکان ہے کہ 3310 جیسا کوئی پرانا فون بھی سامنے آسکتا ہے۔بڑی موبائل کمپنیاں جیسے ہیواوے، ایچ ٹی سی، ایل جی اور موٹرولا اس ایونٹ میں فلیگ شپ فونز متعارف نہیں کرارہے۔ چینی کمپنی ہیواوے کی جانب سے اگلے ماہ یعنی مارچ میں نیا فلیگ شپ فون پیش کیا جائے گا، ایچ ٹی سی کی جانب سے ورچوئل رئیلٹی ٹیکنالوجی پر کچھ پیش کیا جائے گا، موٹرولا کی جانب سے موٹو جی سیریز کے فونز پیش کیے جانے کا امکان ہے جبکہ ایل جی گزشتہ سال کے وی تھرٹی فون کے اپ ڈیٹ ورژن کو پیش کرسکتی ہے۔