پوپ کا کرسمس پیغام، انسانوں کی انسانوں سے لاتعلقی پر تنقید

کیتھولک مسیحیوں کے روحانی پیشوا پوپ فرانسس نے کرسمس کے مسیحی تہوار کے موقع پر اپنے پیغام میں غیر متوازن انسانی رویوں اور انسانوں کی انسانوں سے لاتعلقی پر تنقید کی ہے۔ ویٹیکن سٹی کے پیٹرز اسکوائر میں چوبیس اور پچیس دسمبر کی درمیانی شب ہزارہا کیتھولک زائرین کے شبینہ اجتماع سے خطاب کرتے ہوئے پاپائے روم نے کہا کہ آج کے دور میں انسان اتنا لالچی ہو چکا ہے کہ اس کی حرص کا پورا ہونا ممکن ہی نہیں رہا۔ انہوں نے کہا کہ مادی اشیاء کا حصول بہت سے انسانوں کے لیے ان کی زندگی کا مقصد بن چکا ہے، جو غلط ہے۔ اپنے اس خطاب میں پوپ فرانسس نے انسانوں کے مابین پائی جانے والی عدم مساوات پر بھی تنقید کی۔